Fae Cowie's Craig

Here's a poem I wrote a couple of years ago called Fae Cowie's Craig. You'll do well to find it named on a map, but Cowie's Craig (pictured above) is the highest point up at the Lead Mines between Newtownards and Conlig and, when I was wee, my dad often used to take my brother and me up there as it's a fantastic vantage point. Fast forward 30+ years to a Saturday, when I looked out at it from my bedroom window and decided to take my dogs there for a walk. Later on, as I stood there, with the wind in my hair, I realised that many of the places I could see have played an important part in the history of the area - and that prompted me to put pen to paper.

FAE COWIE’S CRAIG

Stud thonner, oan tha leevin roak
O Cowie’s Craig,- grun alow banefire bleck -
Pit me in mine o Ninetie-Echt,
Tha nicht lift rid fur simmer sodjers trysts.
Drumhirk an Gransha fairmers’ sins,
Cottown chiels, Green Boys o Greba, Hairts o Doon
Turn’t oot tae richt sim wrangs, an
Hunners deed, at Sanfiel an Ba’nahinch.

An, doon tha Lough, thon’s Chapel Isle,
Raxin owre, tha oul yins roàd, tae Nendrum.
Nearhaun bes Cummer, ticht wee toon,
Aye weel-kent fur her whuskey - an early
Prittas. Aa’s quate noo, nae millies
Doon at Andras’, whaur weel-aff fowk noo bide,

Titanic Tam’s mindit wi a Haa, an

“Yin mair shot” G’lespie stauns in stane.

Luk - thon’s Tha Dee, whaur oor yins cum
Fae Gallowa, fower hunnert yeir syne noo.
Fowkgates, thrift, kirk an tung the’ brocht,
An turn’t tha wastit lan tae mak it guid.
Here, Innismurray brocht tha guns
Bak in Fowerteen, tae fecht agin Hame Rule.
An thonner’s Bellycopeland mill,
Thrang nae mair, waas lichtit wi simmer sin.

Whitespots, bes whut we caa this lann
Whaur yince fowk hoked fur lead (the’ caa’d it “whites”)
Doon coul wat mirky pots, tae fill
Their childer’s wames whun prittas haed tha blicht.
Abune tha plantin, Helen’s Toor,
Whaur Carson’s men camp’t fornent Bleckwood’s place,
Bellyleidy, o Clan Hugh Boy,
Afore tha Somme left Ulster fowk hairt-scaudit.

Noo scrammlers swairm owre whunnie knowes,
Fowk oot a danner deaved wi thar bizzin
Yeir roon, forbye laired in slonks an gutters,
Breeks clabbert wi glar tha wuntèr days.
Aa’s quate noo, an twathie deer’s pit up wi
Snokin dugs, ir sim siclike, an
Far awa, tha soon o lambegs
Dunnerin owre Conlig hill at dayligan.

An, unner Scraba, Newtown bes,
Braw bowle whaur Ah wus bakit – thar’s nane her make.
Her Meer’s chain o gowden floors
Wrocht, that skeelie Granda Dickson growed. Here
Boul Colonel Paddy caa’d his hame,
An Lyttle spun his cantie wabs o
Ards an Tullynagardy Glen, whaur
Daft Eddie foon McFadden, by tha Forkins.

By Movilla’s green hill thonner
Bes tha last lang road A’ll tak,
Life’s travel’s irnae daen, but, noo,
Ma ticket no yet clip’t, A mak fur hame.
Sauf yince mair, A staun lukkin oot
Ma gavel windae, owre oul reuch fiels o
Yella-floor’t whuns, drochtit gress, an

Tummelt doon stane dykes, tae Cowie’s Craig.

Tullynagardy Glen

Here's anither yin o tha photos A tuk o tha view fae ma wee hoose, lukkin iver tha Tullynagardy Glen, tha Crawfordsburn Road an Cairn Wood.

Tha Tullynagardy Glen (tha OS caa's it "The Golden Glen") is whaur Daft Eddie's Cave wus in W G Lyttle's buik, Daft Eddie or The Smugglers Of Strangford Lough. Mr McFadden wus tuk tae tha cave efter he wus kidnapped by Tha Merry Hearts o Down. A mine yin day gan doon tha glen lukkin fur tha cave an faain on ma arse in tha burn! Whut A didnae hear tae efter is it's meant tae be unner tha watter o tha Heich Dam. A wunner did onie o tha boys in tha Wilefowlers see ocht o it twathie yeir syne whun the' haed aa tha watter let oot fur tae big thon hydro-electric thang doon thonner?

Aamaist in tha wurds o Monty Python, noo fur simthang else aathegither. A'm no lang beck fae tha hoose o a freen . A wus haein bither gettin a thang daen, an this lass is in tha richt line o wark sae, tha mair A haednae clappt een oan her this ages, A gied her a caa tae esk if she wud dae this thang fur me, an wioot a thocht says she tae me, "Nae bither, cum on iver". Noo it wusnae ocht immoral, ir agin tha laa, but it wus a wee hair oot o tha ordinar, sae A wus quare an gled. Tae freens - whaur wud we aa be wioot them!